Contents
အစာအုပ်စုများ
အစားအစာတို့တွင် ကြွယ်ဝစွာပါဝင်သည့် အာဟာရဓာတ်များ၏ အဓိကအကျိုးပြုမှုအပေါ် မူတည်၍ အစာအုပ်စု (၃) စု ခွဲခြားထားပါသည်။ အစာအုပ်စု (၃) စုမှ အစားအစာများကို စုံလင်မျှတစွာ ပါဝင်အောင် နေ့စဉ်ပြင်ဆင်စားသုံးရပါမည်။
အာဟာရဓာတ်
အာဟာရဓာတ်သည် အသွေး၊ အသား၊ အင်အားတို့ကို ဖြစ်စေတတ်သော သြဇာဓာတ်ဖြစ်သည်။ သက်ရှိသတ္တဝါတို့ ခန္ဓာကိုယ် အသက်ရှင်ကျန်းမာရေးအတွက် လိုအပ်သော ဇီဝဓာတုပစ္စည်းများဖြစ်ပြီး အစားအစာများ စားသုံးခြင်းဖြင့် ရရှိနိုင်သည်။ ခန္ဓာကိုယ် ဖွံ့ဖြိုးခြင်း၊ လှုပ်ရှားသွားလာခြင်း၊ မျိုးဆက်ပွားခြင်း၊ အင်အားဖြစ်စေခြင်းနှင့် ရောဂါကာကွယ်ခြင်းတို့အတွက် အာဟာရဓာတ်အမျိုးမျိုး လိုအပ်သည်။ အာဟာရလိုအပ်ချက်များသည် အသက်အရွယ်၊ ကျား /မ၊ ကိုယ်လက်လှုပ်ရှားမှု၊ ကျန်းမာရေးအခြေအနေတို့အရ ကွာခြားသည်။
အာဟာရဓာတ် (၆) မျိုး
ခန္ဓာကိုယ်အတွက် လိုအပ်သော အာဟာရဓာတ် (၆) မျိုးမှာ (က) ကစီဓာတ် (ခ) အဆီဓာတ် (ဂ) အသားဓာတ် (ဃ) သတ္တုဓာတ် (င) ဗီတာမင်ဓာတ်နှင့် (စ) ရေဓာတ်တို့ဖြစ်ကြသည်။
အစာအုပ်စုနှင့် အာဟာရဓာတ် ကြွယ်ဝသောအစာများ
အာဟာရမျှတစေရန် နေ့စဉ် စားသုံးသည့်အကြိမ်တိုင်းတွင် အစာအုပ်စု (၃) စုလုံး ပါအောင်စားပါ။
အစာအာဟာရဆိုင်ရာ လိုက်နာသင့်သည် အချက်များ
၁။ နေ့စဉ် စားသုံးသည့်အကြိမ်တိုင်းတွင် အစာအုပ်စု (၃) စုလုံးပါအောင် စားပါ။
၂။ အသား၊ ငါး၊ ဥအမျိုးမျိုး၊ နို့နှင့် နို့ထွက်ပစ္စည်းများကို နေ့စဉ်စားသုံးပါ။
၃။ဟင်းသီးဟင်းရွက်နှင့် သစ်သီးဝလံများကို များများစားသုံးပါ။
၄။အိုင်အိုဒင်းဆားကိုသာ သုံးစွဲပါ။
၅။ ရေကို လုံလောက်အောင် သောက်ပါ။
၆။ အသင့်စားအစာများထက် သန့်ရှင်းလတ်ဆတ်၍ ဘေးဥပါဒ် အန္တရာယ်ကင်းသော သဘာဝအစာများကို ရွေးချယ်စားသုံးပါ။
၇။ အဆီအမျိုးမျိုး၊ အငန်နှင့် ချိုသောအစာများကို ဆင်ခြင်၍ စားသုံးပါ။
၈။ အချိုရည်များကို ဆင်ခြင်၍ သောက်သုံးပါ။
၉။ ကိုယ်ဝန်ဆောင်များနှင့် နို့တိုက်မိခင်များ အာဟာရပြည့်ဝသောအစာများ ပိုစားပါ။ အစားမရှောင်ပါနှင့်၊ မွေးစမှ အသက် (၆) လအထိ မိခင်နို့တစ်မျိုးတည်းသာ တိုက်ကျွေးပါ။
၁၀။ အသက် (၆) လမှ စတင်၍ အာဟာရပြည့်ဝသော ဖြည့်စွက်စာအမျိုးမျိုးကို အသက်အရွယ်အလိုက် စုံလင်အောင်ကျွေးရင်း မိခင်နို့ကို အသက် (၂)နှစ်အထိ တိုက်ကျွေးပါ။
၁၁။ ကလေးများနှင့် ပျိုဖော်ဝင်အရွယ်များ အစွမ်းကုန် ကြီးထွားဖွံ့ဖြိုးနိုင်စေရန် ခန္ဓာကိုယ်ကြီးထွားဖွံ့ဖြိုးစေသော အစာများပို၍ကျွေးပါ။ ၁၂။ သက်ကြီးဘိုးဘွားဘဝတွင် အာဟာရဓာတ်များ ကြွယ်ဝသည့်အစာများကိုသာ ရွေးချယ်စားသုံးပါ။