ကျန်းမာရေးဆိုင်ရာ စံပြု အချက်အလက်များ

  1. Home
  2. Docs
  3. ကျန်းမာရေးဆိုင်ရာ စံပြု အချက်အလက်များ
  4. အပိုင်း (၁၀) သက်ကြီးဘိုးဘွား ကျန်းမာရေးစောင့်ရှောက်မှု
  5. ပျော်ရွှင်တက်ကြွ သက်ကြီးဘဝ

ပျော်ရွှင်တက်ကြွ သက်ကြီးဘဝ

သက်ကြီးဘိုးဘွားများအနေနှင့် အသက်ကြီးခြင်းနှင့် အတူဖြစ်ပေါ်လာသော နာတာရှည် အခြေအနေများကို ထိန်းသိမ်းပြီး ပျော်ရွှင် တက်ကြွသည့် သက်ကြီးဘဝရရှိစေရန် ငယ်ရွယ်စဉ်ကပင် ကျန်းမာရေးနှင့်ညီညွတ်သော လူနေမှုပုံစံများကို လိုက်နာကျင့်သုံးရပါမည်။ အသက်(၃၅)နှစ်အရွယ်မှ စတင်ပျိုးထောင်သင့်ပါသည်။

Contents

တက်ကြွ၍ ကျန်းမာသန်စွမ်းသော သက်ကြီးဘိုးဘွားဘဝကိုရရှိစေရန် ဆောင်ရွက်ရမည့်အချက်များ

တက်ကြွ၍ ကျန်းမာသန်စွမ်းသော သက်ကြီးဘိုးဘွားဘဝကိုရရှိစေရန် ဆောင်ရွက်ရန် လိုအပ် ပါသည်။ ကိုယ်ကာယလှုပ်ရှားမှုလေ့ကျင့်ခန်းများကို ပုံမှန်ဆောင်ရွက်ပါက ရောဂါများကို ကြိုတင်ကာကွယ်နိုင်ပြီး အသက်ကြီးရင့်မှုကြောင့် ဖြစ်ပေါ်လာနိုင်သည့် မသန်မစွမ်းဖြစ်မှုများကို နှောင့်နှေးစေသည့်အပြင် အချို့သောရောဂါကုသမှုအတွက် အထောက်အကူ ဖြစ်စေနိုင်ပါသည်။

သက်ကြီးဘိုးဘွားများ၏ ကျန်းမာရေးအတွက် ကိုယ်ကာယလေ့ကျင့်ခန်း
  • ကိုယ်ကာယလှုပ်ရှားမှု လေ့ကျင့်ခန်းများနှင့်အားကစားသည် သက်ကြီးဘိုးဘွားများတွင် ဖြစ်ပေါ်လေ့ရှိသော ဇီဝဖြစ်ပျက်မှု မြန်ဆန်စွာ ပျော့ပျောင်းခြင်းနှင့် ပျက်စီးနှုန်းကို လျော့ကျစေပြီး ပိုမိုကောင်းမွန်သော ကိုယ်ခန္ဓာတည်ဆောက်မှုကို ရရှိစေပါသည်။ ခန္ဓာကိုယ် ကြွက်သားများ သန်မာခြင်းများအတွက် အားကစားလေ့ကျင့်ခန်းများက ကူညီနိုင်ပြီး လဲကျခြင်းနှင့် အိပ်ရာနာများ ဖြစ်ပွားခြင်း လျော့နည်းအောင် ကာကွယ်နိုင်ပါသည်။
  • သက်ကြီးများတွင် ဖြစ်ပွားလေ့ရှိသော အဆစ်အမြစ်ရောင်ရောဂါများ သက်သာစေရန်၊ အရိုးကျိုးခြင်းနှင့် လေဖြတ်၍ ကိုယ်ခန္ဓာ မသန်စွမ်းခြင်းများတွင် ပုံမှန်လှုပ်ရှားသွားလာနိုင်မှု ပြန်လည်ရရှိရန်အတွက်လည်း အထောက်အကူပြုပါသည်။
  • ကိုယ်ကာယကျန်းမာရေးလေ့ကျင့်ခန်းများနှင့် အားကစားလေ့ကျင့်ခန်းများကို ပုံမှန်လုပ်ဆောင်သည့် သက်ကြီးဘိုးဘွားများတွင် နှလုံးနှင့် သွေးလှည့်ပတ်မှုလုပ်ငန်းများ ပိုမိုကောင်းမွန်စေခြင်း၊ သွေးတိုးကျစေခြင်း၊ သွေးတွင်းရှိ အဆီများနေခြင်းများကို လျော့ကျ စေခြင်း၊ အသက်ရှူလမ်းကြောင်းစနစ်၏ လုပ်ငန်းများ ကောင်းမွန်လာစေခြင်း၊ အရိုးပွခြင်းကို ကာကွယ်ခြင်း၊ ကြွက်သားများ သန်စွမ်း ပျော့ပျောင်းလာခြင်းနှင့် လှုပ်ရှားမှု ပိုမိုကောင်းမွန်လာခြင်းစသည့် အကျိုးကျေးဇူးများကိုလည်း ရရှိနိုင်ပါသည်။
  • ထို့အပြင် စိတ်ပူပန်မှု၊ စိတ်ဓါတ်ကျဆင်းမှုတို့ကို လျော့နည်းစေပြီး မိမိနှင့် သက်တူရွယ်တူများကိုလည်း တွေ့ဆုံ၍ အတွေ့အကြုံများ ဆွေးနွေးဖလှယ်နိုင်ကာ စိတ်ပျော်ရွှင်မှု ရရှိနိုင်ပါသည်။
သက်ကြီးဘိုးဘွားများတွင် လေ့ကျင့်ခန်း လုံးဝမပြုလုပ်သင့်သော အခြေအနေများ
  • တုပ်ကွေးရောဂါ ခံစားနေရချိန်
  • ဖျားနာချိန်
  • ရင်ဘတ်အောင့်သည့်အချိန်
  • သွေးခုန်နှုန်းပုံမှန်မဟုတ်သည့်အချိန်
  • လေ့ကျင့်ခန်းလုပ်ခြင်းကြောင့် ဖြစ်တတ်သော ပန်းနာရင်ကျပ်ရောဂါများ ဖြစ်နေသည့်အချိန်
  • နှလုံးလှုပ်ရှားမှု မမှန်ကန်သည့်အချိန်
  • အစာကို ဗိုက်ပြည့်အောင်စားပြီးအချိန်
ကိုယ်ကာယကြံ့ခိုင်မှု လေ့ကျင့်ခန်းများ ဆောင်ရွက်ရာတွင် သက်ကြီးဘိုးဘွားများ လိုက်နာရမည့်အချက်များ

သက်ကြီးဘိုးဘွားများ ကိုယ်ကာယကြံ့ခိုင်မှုလေ့ကျင့်ခန်းများ ဆောင်ရွက်ရာတွင် အောက်ပါအချက်များကို လိုက်နာရန် လိုအပ်ပါသည်။

  • ကိုယ်ကာယကြံ့ခိုင်မှု လေ့ကျင့်ခန်းဆောင်ရွက်နေစဉ် ဒဏ်ရာမရရှိစေရန် ဂရုစိုက်ရမည်။
  • လေ့ကျင့်ခန်းများကို ဖြည်းဖြည်းမှန်မှန် ဆောင်ရွက်ရမည်၊ ချက်ချင်းပြင်းထန်စွာ မပြုလုပ်ရ။
  • လေ့ကျင့်ခန်းပြုလုပ်ရာတွင် ရုတ်တရက်ခန္ဓာကိုယ်ကို လိမ်၍ ပြုလုပ်ခြင်း၊ ပြင်းထန်စွာ ခုန်ခြင်းများ မပြုလုပ်ရ။
  • လေ့ကျင့်ခန်းများကို စတင်ဆောင်ရွက်ရာတွင် တစ်ပတ်လျှင် နှစ်ကြိမ်၊ တစ်ကြိမ်လျှင် မိနစ် (၃၀)ကို ဖြည်းဖြည်းမှန်မှန် ဆောင်ရွက်ရမည်။ (ပြင်းပြင်းထန်ထန် မလုပ်ဆောင်ရပါ။) လေ့ကျင့်ခန်းများကို တစ်ပတ်လျှင် (၅)ရက်၊ တစ်ရက်လျှင် မိနစ်(၃၀) လုပ်ဆောင်ပါက သက်ကြီးဘိုးဘွားများအတွက် လုံလောက်ပါသည်။
  • ကိုယ်ကာယလေ့ကျင့်ခန်းများ မဆောင်ရွက်မီ သွေးပူလေ့ကျင့်ခန်းကို သေချာစွာ ပြုလုပ်ရမည်။
  • လေ့ကျင့်ခန်းပြုလုပ်မည့်နေရာများတွင် သောက်ရေ လုံလောက်စွာ ထားရှိရမည်။
  • ပြင်းထန်သော ရာသီဥတုအခြေအနေများဖြစ်သည့် ပူလွန်းသည့်အချိန်၊ ပတ်ဝန်းကျင်လေထုခြောက်သွေ့နေသည့်အချိန်၊ အေးလွန်းသည့် အချိန်၊ လေပြင်းများ တိုက်ခတ်သည့် အချိန်များတွင် ကိုယ်ကာယလေ့ကျင့်ခန်းများ မပြုလုပ်သင့်ပါ။
သက်ကြီးဘိုးဘွားများတွင် အလွယ်ကူဆုံးနှင့် အသင့်လျော်ဆုံးသော လေ့ကျင့်ခန်းများ
  • ၁။ တစ်နေ့လျှင် နာရီဝက်ခန့် လမ်းလျှောက်ခြင်း
  • ၂။ ရွရွလေးပြေးခြင်း
  • ၃။ ထိုက်ကျိကစားခြင်း
  • ၄။ ဖြည်းညင်းစွာ အေရိုးဗစ်ကစားခြင်း
  • ၅။ရပ်လျက်စက်ဘီးနင်းလေ့ကျင့်ခန်းပြုလုပ်ခြင်း

အထက်ပါလေ့ကျင့်ခန်းများကို သီးသန့်မပြုလုပ်နိုင်ပါက

  • ၁။အိမ်တွင်လှေကားတက်ဆင်းခြင်း
  • ၂။ပန်းခြံရှင်းခြင်း၊
  • ၃။အိမ်မှုကိစ္စပြုလုပ်ခြင်း
  • ၄။ကခြင်း (မြန်မာအက၊ အနောက်တိုင်းအက)
  • ၅။ကလေးများ (သားသမီး၊ မြေး) များနှင့်အတူ လှုပ်ရှားမှုများ ပြုလုပ်ခြင်း

သက်ကြီးဘိုးဘွားများတွင်အဖြစ်များသော သွေးတိုးရောဂါ ကာကွယ်ရေး

သက်ကြီးဘိုးဘွားများတွင် အပေါ်သွေး 140 mmHg နှင့် အထက်ကျော်လျှင် သို့မဟုတ် အောက်သွေး 90 mmHg ကျော်လျှင် သွေးတိုးရောဂါရှိသည်ဟု သတ်မှတ်ပါသည်။

သွေးတိုးရောဂါဖြစ်ပွားရသော အကြောင်းရင်းများ
  • မျိုးရိုးဗီဇရှိခြင်း
  • ဆေးလိပ်သောက်ခြင်း
  • အရက်သောက်ခြင်း
  • ကိုယ်လက်လှုပ်ရှားမှု နည်းပါးခြင်း
  • အဆီနှင့်အငန်ကို လွန်ကဲစွာ စားသောက်ခြင်း
  • ပိုတက်စီယမ်ဓါတ်နှင့်အမျှင်ဓါတ် စားသုံးမှုနည်းပါးခြင်း
  • စိတ်ဖိစီးမှုများပြားခြင်း
သွေးတိုးရောဂါ၏ နောက်ဆက်တွဲဆိုးကျိုးများ

သွေးတိုးရောဂါ နောက်ဆက်တွဲအဖြစ် နှလုံးရောဂါ၊ လေငန်းရောဂါနှင့် ကျောက်ကပ်ပျက်စီးခြင်းများ ဖြစ်ပွားနိုင်ပါသည်။

သွေးပေါင်ကျတတ်သော အခြေအနေများ

အချို့သော အသက်ကြီးသူများမှာ အစာစားပြီးစချိန်တွင် သွေးပေါင်ကျတတ်ပါသည်။ 5 mmHg မှ 20 mmHg အထိကျနိုင် ပါသည်။ အထူးသဖြင့် အစာပူပူစားပြီးချိန်၊ အရက်သောက်ပြီး စချိန်တို့တွင် ဖြစ်တတ်ပါသည်။ သွေးပေါင်ကျခြင်းမှာ (၂) နာရီမှ (၃)နာရီ အထိ ကြာမြင့်နိုင်ပါသည်။

သက်ကြီးဘိုးဘွားများ သွေးပေါင်ချိန်ရာတွင် သတိပြု ဆောင်ရွက်ရမည့် အချက်များ

သွေးပေါင်ချိန်သည့်အခါ လူနာကို အတန်အသင့် အနားယူချိန်ပေးပြီး နှစ်ကြိမ် (သို့မဟုတ်) နှစ်ကြိမ်အထက် တိုင်းယူသင့်ပါသည်။ သက်ကြီးဘိုးဘွား ဆေးခန်းများတွင် ထိုင်လျက်သွေးပေါင်ချိန်သာမက မတ်တပ်ရပ်လျက် သွေးပေါင်ချိန်ကို တိုင်းယူခြင်းဖြင့် မတ်တပ် ရပ်ချိန်တွင် သွေးပေါင်ကျခြင်းကို သတိပြုနိုင်ပါသည်။ သို့မှသာ သွေးကျဆေးများပေး၍ သွေးတိုးချိန်ညှိရာတွင် မတ်တပ်ရပ်လျက် အချိန်တွင်ရှိသော သွေးပေါင်ချိန်ကိုပါထည့်သွင်း စဉ်းစားမှ ပိုမိုထိရောက်စွာ ကုသနိုင်မည်ဖြစ်ပြီး မတ်တပ်ရပ်ချိန် သွေးပေါင်ချိန် လျော့ကျခြင်းကြောင့် ခံစားရသည့် မူးနောက်ခြင်း၊ ယိမ်းယိုင်ခြင်း၊ လဲကျခြင်းများကို ကာကွယ်နိုင်မည်ဖြစ်ပါသည်။

သွေးတိုးရောဂါကုသမှုခံယူနေစဉ်တွင် လိုက်နာရမည့်အချက်များ
  • ကိုယ်အလေးချိန်လျှော့ချပါ။
  • ဆားအငန်ဓါတ်ကိုလျော့စားပါ။ဟင်းသီးဟင်းရွက်နှင့် အမျှင်ဓါတ်များသော အစားအသောက်များကို စားသုံးပါ။
  • ပုံမှန်ကာယလေ့ကျင့်ခန်းပြုလုပ်ပါ။
  • ဆေးလိပ်ဖြတ်ပါ။
  • တတ်နိုင်ပါက အရက်ဖြတ်ပါ။
Was this article helpful to you? Yes No